موضوع مميز: ~ تقارير نهاية السنة >.< ! + links

دخل شهر ذو القعدة .. وبدأ العد التنازلي لنهاية عام 1430 هـ
وصار الوقت نراجع أنفسنا ونشوف مدى الإنجازات اللي حققناها هالسنة ..
., محاسبة النفس شي ضروري في حياتنا عشان نعرف وين مكاننا بالضبط
وايش جالسين نسوي ..


نهاية كل عام أشوف عند أمي قائمة لتقييم الأداء الوظيفي للمعلمات ترفعها للإشراف

فيه معلمات يبذلوا جهد فعلاً وحريصين عالتقييم والأداء ,
وفيه معلمات تدريسهم أي كلام ونايمين طول السنة ولما يشوفوا درجات الأداء منخفضة
يزعلوا و يقولوا لأن إحنا ماكنا كذا ..



هنا بنقيم نفسنا بنفسنا.. وبنكون صريحين ,
كان أدائنا ممتاز طول السنة معناته أنجزنا وبنفرح لتقدمنا ..
وإذا كان أدائنا متكاسل و راح من بالنا هالتقييم .. معناته ( إخص علينا )
ولازم نزعل على حالنا


وإذا كنا نص ونص .. أنجزنا جزء من الأهداف وجزء كسلنا عنه ..
بنشوف وين الخطأ في الخطة اللي مشينا عليها ؟

جاهزين ؟
يللا جيبوا قائمة أهدافكم للسنة الي فاتت ..

يتبـع

بداية السنة سويت قائمة بـ 30 هدف ..

وما أخبي عليكم ماكنت جادة في بعضها , بس كنت بملي السطور ..

والنتيجة إنه ماكان عندي حماس أو دافع يخليني أنجز, وكل ماشفت القائمة أقول .. ايه خليها الصيف لما أفضى ..

قائمتي لـ 2009 :

· لم تنجز :

- أصمم مفكرة خاصة بالبنات
- أسوي دورة في إقلاع
- أقرأ 8 كتب انجلش
- أحفظ سورة الكهف والملك وجزئين من القرآن .
- آخذ رخصة قيادة
- أجيب معدل 3.5
- أحافظ على الرياضة

· أنجزتها :

- أقرأ 35 كتاب و أستوعبهم .
- أزيد معدل ثقافتي .
- آخذ دورة في الصحافة .
- أترك أثر في كل إنسان أمر عليه.
- أساهم في ادخال كتاب في كل بيت عن طريق كتابة قراءات عن الكتب.
- تكون مدونتي ناجحة ومفيدة ولها إقبال.
- أدرس تصوير فوتوغرافي



بداية كل سنة لما نجي نخطط , نشوف السنة طويلة قدامنا ونقول أكيد بيمدينا ننجز كثير ..

ونعبي الصفحة كلها " أمنيات" أكثر من إنها تكون " أهداف "
وبالتالي ماراح تكون عندك رغبة جادة في تحقيقها ..
لأنك ما استعديتي نفسيَاً لها , و شي طبيعي ما حتنجزيها ..

بس لما نحدد أهداف فعلاً نبغى نحققها ومستعدين نبذل جهد فيها حتى لو كانت قليلة ,

بنلقى لها وقت و شعور بالحماس طول السنة .. ونهاية العام نكون أنجزناها على أكمل وجه !



:



تكلمنا في دورة غيرلي حياتي عن الرسالة والرؤية و أهمية التخطيط في الحياة ..

الإنسان بدون هدف في حياته كأنه واحد يلعب كورة بدون مرمى !
يلعب يلعب ويلعب بدون نتيجة !

بعد ما شفتي قائمة أهداف السنة اللي فاتت .. كم بالمية حققتي منها تقريباً ؟
50% , 20% , أو 6 % ؟



جاوبي بصراحة :

- هل كانت عندك عزيمة وإصرار على الإنجاز ؟

- اذا كانت اجابتك نعم أو لا .. في اعتقادك ماهو السبب ؟

- كيف توصفي نفسك هالسنة ؟


:

[right]· الاستعداد لخطة جديدة ( شحذ المنشار )

هذي أهم خطوة وهي الاستعداد و دايم يسموها ( شحذ المنشار).

تاخذ منك 3 أيام أو أكثر على حسب معرفتك لذاتك . كل ما كانت معرفتك لذاتك كبيرة قدرتي تحدديها في وقت أسرع .

المطلوب منك ( التفكير ) ..

الأوقات اللي تكوني مروقة فيها وذهنك صافي مثلاً قبل النوم , بعد الشاور , في السيارة ..

المهم مايكون معك أحد يشوش عليك تفكيرك , اسألي نفسك وجاوبي ..

- ايش الأهداف اللي ماقدرت أحققها هالسنة ؟ ليه ماحققتهم ؟
- السنة الجديدة ايش أبغى أحقق أهداف ؟ لو ماحققتهم ايش بيصير ؟
- كيف أتخيل نفسي بعد سنة ؟

الأسئلة ممكن تجي معك أكثر من كذا وتتشعب , وإذا مالقيتي جواب لهم ..

عيدي الأسئلة و اجلسي مع نفسك زيادة الين ماتعرفي بالضبط أهدافك .